|
ԵՎ ՀՅՈՒՍՎԵՑ ՆՐԱ ՀԵՔԻԱԹԸ
Քսանչորս տարի առաջ այս տղան աշխարհ եկավ: Նրա աշխարհը Վարդենիսի շրջանի Կարճաղբյուր գյուղն էր. հողագործ ծնողները, գյուղի դպրոցը, ընկերները տեղավորվեցին այդ փոքրիկ աշխարհում, ուր հյուսեց իր հեքիաթը: Մեծանալով աշխարհն իր աչքին փոքրացավ: Նա ընդունվեց Երևանի Ճարտարագիտական համալսարան: Հինգ տարին բավականին ժամանակ էր ընկալման ծառավին հագուրդ տալու համար: Սովորեց ու էլի …. սովորեց: Այդ տարիներին էր որ հանդիպեց Սուսաննային: Նրանց ամուսնությունը պատճառ դարձավ հյուսելու հեքիաթի երկրորդ մասը: 1993թ հոկտեմբերի 19-ին Վարդենիսի շրջանային զինկոմիսարիատի կանչով Արա Գրիգորյանը կանչվեց բանակ: Եվ հյուսվեց հեքիաթի երրորդ մասը: Նոր միջավայր, զինվորական կարգապահություն, բանակի օրենքներ, ՀՀ զինվոր լինելու դժվար պատասխանատվություն: Արան արագ հարմարվեց զինվորական կյանքին, նրան սիրեցին, վայելեց ընկերների հարգանքը, դարձավ գումարտակի սիրելի սպան: Օրերն անցան ու երկու ամիս զինվորական պատրաստվածություն ստանալուց հետո հոկտեմբերի 27-ին ընկերների հետ Արան մեկնեց ռազմաճակատ: Ու նա հյուսեց իր հեքիաթի չորրորդ մասը, կռվեց անմնացորդ: Արեց այն ինչի մասին հավանաբար չէր էլ մտածել իր փոքրիկ աշխարհի աստղազարդ երկնքին նայելիս: Նա կռվեց ու հաստատեց իրեն որպես հայ զինվոր։ Դեկտեմբերի 30-ին մարտի դաշտում զոհվեց Արա Գրիգորյանը: Ավելորդ են ամեն-ամեն տեսակ բաներ, ածականներ, որակումներ: Նա հաստատեց իրեն ու այստեղ սկսեց հյուսվել նրա հեքիաթի հինգերորդ մասը: Քսանչորս տարի հետո այս տղան աշխարհից հեռացավ:
ԱՐԱ ՌՈՒԲԵՆԻ ԳՐԻԳՈՐՅԱՆ ԵՎ ՀՅՈՒՍՎԵՑ ՆՐԱ ՀԵՔԻԱԹԸ
Արա Ռուբենի Գրիգորյանը ծնվել է 1970թ սեպտեմբերի 20-ին, Վարդենիսի շրջանի Կարճաղբյուր գյուղում: Նա 1977-78 ուս.տարում ընդունվել է Կարճաղբյուրի միջնակարգ դպրոցի առաջին դասարան և 1986-87ուս. տարում ավարտել է նույն դպրոցի տասերորդ դասարանը:
Ուսման անցած Արա Գրիգորյանը իրեն դրսևորել է, որպես լավագույն աշակերտ: Նա ակտիվ մասնակցություն է ունեցել դպրոցի կյանքին, հասարակական բոլոր առաջադրանքները կատարել է ճիշտ և ժամանակին: Մեծ հետաքրքրություն է ունեցել դեպի հումանիտար առարկաները և սպորտը: 1987թ ընդունվել է Երևանի Ճարտարագիտական համալսարանի մեքենաշինական ֆակուլտետը: Ուսումնական տարիներում Արա Գրիգորյանը իրեն դրսևորել է, որպես լավագույն ուսանող (ուսմանը զուգընթաց Արան հաճախել է զինվորական դասընթացների): 1993թ ավարտել է նույն համալսարանը, ինժեների մասնագիտությամբ: Նույն թվականին էլ Արա Գրիգորյանը, որպես սպա զորակոչվում է ՀՀ բանակ ծառայելու: Հայրենիքի համար վճռական այս ժամանակաշրջանում, որպես կամավոր մեկնում է սահմանային շրջան: Այստեղ միանում է սահմաները պաշտպանող հայ մարտիկներին: 1993 թ-ի դեկտեմբերի 28-ին լույս 29-ի գիշերը հակառակորդի կողմից պաշտպանությունը ճեղքվեց: Հակառակորդի կողմից մեր տղաների թիկունք էր անցել մեկ հետախուզական վաշտ, իսկ հետո հարձակամն էր անցել մեկ գունդ: Արան իր ընկերների հետ մտնում է անհավասար կռվի մեջ: Մեր մարտիկները հերոսաբար դիմադրեցին, բայց քանի որ ուժերը անհավասար էին ստիպված եղան նահանջել, տալով կորուստներ: Զգալով, որ հակառակորդը մեծ արագությամբ է առաջ շարժվում, իսկ մեր տղաները չեն կարող ամրանալ մոտակա բարձրունքներում և հետևանքը կարող է լինել օրհասական,
լեյտենանտ Արա Գրիգորյանը, որպես հայոց բանակի սպա և որպես մեծ հայրենասեր դիմում է անձնազոհության: Մի խումբ տղաների հետ կիրճում փակում են հակառակորդի ճանապարհը, հնարավորություն տալով մեր գումարտակի տղաներին ամրանալ հաջորդ բարձրունքում: Լեյտենանտ Արա Գրիգորյանի ջոկատը կռվում է հերոսաբար, հային վայել հայրենասիրությամբ: Տեսնելով իր ընկերների վիճակը , Արան անձնազոհ կռվում է նահանջող ընկերներին պաշտպանելու համար…
Արան զոհվում է թշնամու կրակոցներից: Արայի հետ մարտնչող տղաները ավարտին են հասցնում նրա կողմից սկսաց սխրանքը: Նրան անվանում են հայ ժողովրդի պանծալի հերոս զավակ, որ իր կյանքը տվեց հանուն հայրենիքի: 1994թ ապրիլի 14-ին կատարվեց Արա Գրիգորյանի թաղման արարողությունը: Թաղման արարողությանը ներկա էին գյուղի ողջ հասարակությունը, հարազատները, ծանոթները, Արայի ուսանողական ու բանակի ընկերները: Արա Ռուբենի Գրիգորյանը իր կյանքի կարճ տարիների ընթացքում ունեցավ բովանդակալից պատմություն: Արայի հիշատակը միշտ վառ կմնա նրա հարազատների ու ընկերների սրտերում:
Հաշվի առնելով նրա սխրանքները ՀՀ կրթության գիտության նախարարությունը, Վարդենիսի շրջանային խորհրդի գործադիր կոմիտեն որոշում է Կարճաղբյուրի դպրոցը անվանել հերոս ազատամարտիկի Արա Գրիգորյանի անունով: Հայ սպայական ժողովի ժամանակ որոշվում է լեյտենանտ Արա Ռուբենի Գրիգորյանին հետմահու կառավարության պարգև ներկայացնելու համար: Այսպիսով Արային շնորհում են <<1992-1994 թթ. Մարտական գործողություներին մասնակից>> կրծքանշանով և մարտական ծառայության մեդալով:
|